मुखेड : आषाढी एकादशीच्या पावन पर्वानिमित्त मुखेड येथील श्री विठ्ठल-रुक्मिणी मंदिरात शनिवारी पहाटेपासूनच भाविकांनी दर्शनासाठी मोठी गर्दी केली. विठ्ठलाच्या नामस्मरणाने आणि टाळ-मृदुंगाच्या गजराने मंदिर परिसर भक्तिरसात न्हाऊन निघाला. विविध भागांतून आलेल्या महिला, पुरुष, ज्येष्ठ नागरिक व बालगोपाळांनी श्री विठ्ठल-रुक्मिणीचे दर्शन घेऊन सुख-समृद्धीची प्रार्थना केली.
मंदिराचे पुजारी चैतन्य मुखेडकर यांनी श्री विठ्ठल-रुक्मिणीची विधिवत पूजा, अभिषेक व महाआरती संपन्न केली. धार्मिक विधीनंतर भाविकांनी मोठ्या श्रद्धेने दर्शन घेत विठ्ठल चरणी कृतज्ञता व्यक्त केली. दिवसभर मंदिरात भाविकांची सतत वर्दळ असल्याने परिसरात उत्साहाचे आणि भक्तिमय वातावरणाचे दर्शन घडले.
आषाढी एकादशीचे औचित्य साधून जान्हवी राईस वर्ल्डच्या वतीने भाविकांसाठी महाप्रसादाचे आयोजन करण्यात आले. संचालक प्रकाश कवटिकवार, प्रवीण कवटिकवार, जीवन कवटिकवार, प्रशांत कवटिकवार तसेच कु. जान्हवी प्रवीण कवटिकवार यांनी स्वतः उपस्थित राहून भाविकांना प्रेमाने महाप्रसादाचे वितरण केले. त्यांच्या या सेवाभावी उपक्रमाचे उपस्थितांनी विशेष कौतुक केले.
मंदिर समिती, सेवेकरी आणि स्वयंसेवकांनी दर्शन व महाप्रसाद वितरणाची व्यवस्था अत्यंत शिस्तबद्ध पद्धतीने सांभाळली. त्यामुळे भाविकांना कोणताही त्रास न होता दर्शनाचा लाभ घेता आला. विठ्ठल नामाच्या अखंड गजरात आणि भक्तिभावाच्या वातावरणात आषाढी एकादशीचा सोहळा अत्यंत उत्साहपूर्ण व मंगलमय वातावरणात संपन्न झाला.
About the Author
