नांदेडची ठप्प पडलेली विमानसेवा पुन्हा सुरू करण्याबाबत नागरी उड्डयण मंत्री ज्योतिरादित्य शिंदे यांनी सकारात्मक प्रतिसाद दिला असून, माजी मुख्यमंत्री अशोक चव्हाण यांनीही अनेक विमान कंपन्यांशी संपर्क साधून नांदेडहून विमानसेवा सुरू करण्यासाठी पाठपुरावा सुरू केला आहे.
चव्हाण यांनी १४ डिसेंबर रोजी नवी दिल्ली येथे शिंदे यांची भेट घेऊन नांदेडची विमानसेवा बंद असल्यामुळे प्रवाशांना होणाऱ्या असुविधेविषयी अवगत केले होते. नांदेडवरून मुंबई, हैद्राबाद, नवी दिल्ली, अमृतसर, चंदिगड, पुणे, शिर्डी, नागपूरसाठी विमानसेवा सुरू करावी, अशी मागणी त्यांनी केली होती. या मागणीला सकारात्मक प्रतिसाद देत नागरी उड्डयण मंत्र्यांनी चव्हाण यांना पत्र लिहिले आहे.’उडाण’ योजनेंतर्गत पुढील टप्प्यातील प्रक्रियेत नांदेडहून मुंबई, हैद्राबाद व शिर्डी या मार्गांवर सेवा सुरू करण्यास कोणत्याही विमान कंपनीने अनुकूलता दर्शवल्यास त्यावर विचार केला जाईल.
‘उडाण’ योजनेंतर्गत केवळ ६०० किलोमीटरपेक्षा कमी अंतरावरील शहरांमध्ये विमानसेवा उपलब्ध करून दिली जाते. नवी दिल्ली, चंदिगड व अमृतसर ही शहरे त्याहून अधिक अंतरावर असल्याने या मार्गांवर व्यावसायिक व्यवहार्यतेनुसार विमान कंपन्या आपली सेवा सुरू करू शकतात, असे ज्योतिरादित्य शिंदे यांनी या पत्रात म्हटले आहे. एवढेच नव्हे तर अशोक चव्हाण यांनी या मार्गांवर विमानसेवा सुरू करण्याबाबत केलेली मागणी आपण नियमित विमानसेवा देणाऱ्या कंपन्यांना कळवत असल्याचेही त्यांनी पत्रात नमूद केले आहे.
नागरी उड्डयण मंत्र्यांच्या स्तरावर नांदेडहून विमानसेवा सुरू करण्याबाबत विमान कंपन्यांशी संपर्क केला जात असल्याने त्यांच्या प्रयत्नांना साथ म्हणून अशोक चव्हाण यांनीही देशातील प्रमुख विमान कंपन्यांशी पाठपुरावा सुरू केला आहे. नांदेड व लगतच्या लातूर, परभणी, हिंगोली जिल्ह्यातून दररोज शेकडो नागरिक मुंबई, हैद्राबाद, पुणे व नवी दिल्लीसाठी प्रवास करतात.
नांदेड येथील सचखंड गुरुद्वारा हे देशातील एक महत्वपूर्ण धार्मिक स्थळ असून, पंजाबमधून येणाऱ्या भक्तांची मोठी संख्या पाहता नवी दिल्लीमार्गे अमृतसर व चंदिगड शहरांसाठी विमानसेवा सुरू केली जाऊ शकते. नांदेडला नाईट लॅंडिंग व नाईट टेक ऑफ यंत्रणा आहे. विमानात इंधन भरण्याची व्यवस्था आहे. एवढेच नव्हे तर नांदेडला इंधन भरल्यास करसवलतीचा देखील लाभ दिला जातो. आवश्यकता असल्यास विमान रात्रभर उभे करण्यासाठी पुरेशी जागा उपलब्ध आहे.
वैमानिक व विमान कर्मचाऱ्यांसाठी शहरात अनेक उत्तम हॉटेल्स आहेत. नांदेडची एकंदर प्रवासी क्षमता आणि येथील विमानतळावरील सुविधा पाहता विमान कंपन्यांनी मुंबई, हैद्राबाद, पुणे, नवी दिल्ली, अमृतसर, चंदिगड आदी शहरांसाठी उड्डाणे सुरू करण्यासाठी सकारात्मकपणे विचार करावा, असे अशोक चव्हाण यांनी या कंपन्यांशी संपर्क साधताना म्हटले आहे. यापूर्वी एअर इंडियाची मुंबई- नांदेड- अमृतर, इंडिगोची नवी दिल्ली- नागपूर- नांदेड तर स्पाईस जेटची मुंबई-नांदेड विमानसेवा सुरू होती, याकडेही त्यांनी या विमान कंपन्यांचे लक्ष वेधले आहे.