मुखेड : (दादाराव आगलावे
तालुक्यातील बेटमोगरा येथे श्री शिवलिंग बादशहा मठ संस्थान यांच्या वतीने दरवर्षीप्रमाणे यंदाही चैत्र महिन्यानिमित्त “चैत्र बारस यात्रा व शिवकीर्तन महोत्सव” मोठ्या उत्साहात आयोजित करण्यात आला आहे. हा महोत्सव शुक्रवार दि. २७ मार्च २०२६ पासून सुरू होऊन दि. ०१ एप्रिल २०२६ पर्यंत विविध धार्मिक व सांस्कृतिक कार्यक्रमांनी संपन्न होणार आहे.
मठ संस्थानच्या वतीने आयोजित या महोत्सवात राज्यातील विविध नामवंत कीर्तनकारांच्या उपस्थितीत शिवकीर्तनाचे आयोजन करण्यात आले असून भाविकांसाठी हा आध्यात्मिक मेजवानीचा कार्यक्रम ठरणार आहे. यावेळी दररोज पहाटे काकड आरती, शिवपाठ, गुरु समाधीस्थळी रुद्राभिषेक, हरिनाम सप्ताह पारायण, प्रवचन तसेच दुपारी गाथा भजनाचे कार्यक्रम होणार आहेत. रात्री 8 वाजता शिवकीर्तन व नंतर शिवजागर कार्यक्रमाने वातावरण भक्तिमय होणार आहे.सोमवार दि. ३० मार्च रोजी रात्री १० वाजता कावड मिरवणूक काढण्यात येणार आहे व राष्ट्रसंत सद्गुरु 108 ष.ब्र. डॉ. शिवलिंग शिवाचार्य महाराज अहमदपूरकर यांच्या प्रेरणेने आणि सद्गुरु 108 ष.ब्र. सिद्धदयाळ शिवाचार्य महाराज यांच्या मार्गदर्शनाखाली दिनांक 27 मार्च शुक्रवार ते दिनांक 1 एप्रिल बुधवार पर्यंत शिवकिर्तन महोत्सव आयोजित केला आहे. महोत्सवाच्या कालावधीत रात्री 8 वाजता विविध कीर्तनकारांची कीर्तने होणार आहेत. त्यामध्ये दि.27 मार्च शुक्रवारी श्री निलेश मुरगे (खानापूर), दि.28 मार्च शनिवारी सौ. शिवकांता सदाशिव पाटील (मुखेड), दि.29 मार्च रविवारी कु. शिवानी रामदास वसमते (बालकीर्तनकार), दि.30 मार्च सोमवारी श्री कैलास महाराज जामकर (डोंगरगाव), दि.31 मार्च मंगळवारी श्री महेश महाराज गिरके (चाकूर) तसेच समारोपाच्या दिवशी दि.1 एप्रिल बुधवारी श्री विश्वनाथ स्वामी पेंनूरकर यांचे सकाळी 10 ते 12 प्रसादावरील किर्तन आयोजित करण्यात आले आहे. तसेच मंगळवार दि. ३१ मार्च रोजी दुपारी ३ वाजता जंगी कुस्त्यांचा फड भरविण्यात येणार असून परिसरातील कुस्तीपटू यामध्ये सहभाग घेणार आहेत. या महोत्सवात विविध गावांतील भजनी मंडळे, गायक व वादक सहभागी होणार असून धार्मिक वातावरणात भक्तिमय कार्यक्रमांची रेलचेल राहणार आहे. कार्यक्रमासाठी परिसरातील भाविक व नागरिकांनी मोठ्या संख्येने उपस्थित राहून उत्सवाची शोभा वाढवावी, असे आवाहन आयोजकांनी केले आहे.
या कार्यक्रमाचे आयोजन श्री शिवलिंग बादशहा मठ संस्थान, बेटमोगरा (ता. मुखेड, जि. नांदेड) यांच्या वतीने करण्यात आले असून आयोजनासाठी स्थानिक भाविक व ग्रामस्थांचे सहकार्य लाभत आहे. कार्यक्रमास येणाऱ्या भाविकांसाठी प्रसादाचीही व्यवस्था करण्यात आली आहे. या उत्सवात बहुसंख्येने सहभागी होऊन आपले जीवन कृतार्थ करून घ्यावे असे श्री शिवलिंग बादशहा मठ संस्थान बेटमोगरा यांच्या वतीने सद्गुरु 108 ष.ब्र. सिद्धदयाळ शिवाचार्य महाराज यांच्या वतीने करण्यात आले आहे.
About the Author
