कंधार : (दिगांबर वाघमारे )
कंधार येथील स्वप्नभूमी नगर परिसरातील श्रीमती गंगाबाई बालक मंदिर व प्राथमिक शाळा येथे जागतिक महिला दिनानिमित्त दि. ८ मार्च रोजी माता-पालक महिलांचा सत्कार करून महिला सन्मानाचा उपक्रम उत्साहात साजरा करण्यात आला.
या कार्यक्रमाच्या माध्यमातून विद्यार्थ्यांच्या जडणघडणीत तसेच समाजाच्या प्रगतीत महिलांचे मोलाचे योगदान अधोरेखित करण्यात आले.
कार्यक्रमाच्या प्रारंभी उपस्थित माता-पालक महिलांचे पुष्पगुच्छ देऊन स्वागत करण्यात आले. शाळेच्या वतीने त्यांच्या कार्याचा गौरव करून शाल, पुष्पगुच्छ देऊन सत्कार करण्यात आला. यावेळी उपस्थित महिलांनीही शाळेच्या उपक्रमांविषयी समाधान व्यक्त करत विद्यार्थ्यांच्या सर्वांगीण विकासासाठी सहकार्य करण्याची भावना व्यक्त केली.या प्रसंगी शाळेचे मुख्याध्यापक हाजी मोहम्मद अन्सारोदिन यांनी महिला दिनाच्या शुभेच्छा देताना सांगितले की, समाजाच्या प्रगतीत महिलांचे योगदान अत्यंत महत्त्वाचे आहे. घर आणि कुटुंब सांभाळत असताना महिलांनी शिक्षण, सामाजिक कार्य व विविध क्षेत्रात उल्लेखनीय कामगिरी केली आहे. विद्यार्थ्यांच्या घडणीत माता-पालकांचा सहभाग महत्त्वाचा असून शाळेच्या विकासात महिलांचे सहकार्य नेहमीच प्रेरणादायी ठरते, असे त्यांनी नमूद केले.
या कार्यक्रमाला शाळेतील सहशिक्षिका मंजुषा केंद्रे, पुष्पा केंद्रे, सविता शेंडगे, लता बाईनवाड तसेच शिक्षक सुनील राठोड, प्रवीणकुमार मंगनाळे, माधव गौतमवाड आदी उपस्थित होते.
कार्यक्रमाचे सुत्रसंचालन सुनील राठोड यांनी केले तर प्रवीणकुमार मंगनाळे यांनी उपस्थितांचे आभार मानले. या कार्यक्रमामुळे शाळेतील विद्यार्थ्यांमध्ये महिलांप्रती आदराची भावना निर्माण होण्यास मदत झाली.
About the Author
