मुखेड: प्रतिनिधी
राष्ट्रीय सर्पदंश तांत्रिक सल्लागार समितीमध्ये माझी निवड होणे ही माझ्यासाठी अत्यंत अभिमानाची आणि जबाबदारीची बाब आहे. भारत सरकारच्या आरोग्य व कुटुंब कल्याण मंत्रालयांतर्गत राष्ट्रीय रोग नियंत्रण केंद्राने (NCDC) देशातील सर्पदंश प्रतिबंध व नियंत्रणासाठी इतक्या महत्त्वाच्या समितीची स्थापना केली असून त्यामध्ये मला स्थान दिल्याबद्दल मी केंद्र सरकारचे मनःपूर्वक आभार मानतो. सर्पदंशामुळे होणारे मृत्यू कमी करण्यासाठी वैज्ञानिक आणि प्रभावी उपाययोजना राबविण्यावर भर दिला जाईल, असे प्रतिपादन मुखेड भूषण तथा डब्ल्यूएचओ चे सदस्य डॉ. दिलीप पुंडे यांनी केले.
भारत सरकारद्वारा स्थापित राष्ट्रीय सर्पदंश सल्लागार समितीत डॉ. दिलीप पुंडे यांचा समावेश केल्यानंतर मुखेड शहर व परिसरातील अनेक व्यक्तींनी त्यांचा हॉस्पिटलमध्ये येऊन सन्मान केला. सन्मानाला उत्तर देताना ते बोलत होते. डॉ. पुंडे पुढे म्हणाले की, ग्रामीण भागात सर्पदंश हा आजही गंभीर सार्वजनिक आरोग्याचा प्रश्न आहे. विशेषतः शेतकरी, शेतमजूर आणि दुर्गम भागातील नागरिकांना वेळेवर उपचार मिळण्यात अनेक अडचणी येतात. गेल्या अनेक वर्षांपासून मी सर्पदंशावरील उपचार, जनजागृती आणि संशोधन क्षेत्रात काम करत आहे. अनेक रुग्णांवर उपचार करताना मला प्रत्यक्ष परिस्थिती जवळून पाहण्याची संधी मिळाली. त्या अनुभवाच्या आधारे राष्ट्रीय स्तरावर काम करण्याची संधी मिळणे हे माझ्यासाठी समाधानकारक आहे. या समितीच्या माध्यमातून देशभरात सर्पदंशाविषयी प्रभावी जनजागृती निर्माण करणे, ग्रामीण भागातील आरोग्य यंत्रणा अधिक सक्षम करणे, डॉक्टर व आरोग्य कर्मचाऱ्यांना आधुनिक उपचार पद्धतींचे प्रशिक्षण देणे. भारतामध्ये दरवर्षी अनेक लोक सर्पदंशामुळे मृत्युमुखी पडतात किंवा कायमस्वरूपी आरोग्य समस्यांना सामोरे जातात. योग्य वेळी योग्य उपचार मिळाल्यास अनेकांचे प्राण वाचू शकतात. त्यामुळे जनजागृती, तातडीची वैद्यकीय मदत आणि प्रमाणित उपचार पद्धती यावर विशेष लक्ष देणे आवश्यक आहे. समितीमध्ये देशातील नामवंत तज्ज्ञ डॉक्टर, संशोधक आणि WHO तसेच ICMR चे प्रतिनिधी सहभागी असल्याने सर्पदंश नियंत्रणासाठी राष्ट्रीय धोरण अधिक प्रभावीपणे राबवले जाईल, असा मला विश्वास आहे. महाराष्ट्रातील सर्पदंश तज्ज्ञ डॉ. हिम्मत बावस्कर, डॉ. सदानंद राऊत यांच्यासह काम करण्याची संधी मिळणेही प्रेरणादायी आहे. ही निवड केवळ माझा सन्मान नसून मुखेड, नांदेड जिल्हा आणि मराठवाड्यासाठीही गौरवाची बाब आहे. भविष्यातही मी समाजहितासाठी आणि सर्पदंशमुक्त भारताच्या उद्दिष्टासाठी प्रामाणिकपणे कार्य करत राहीन.
या सन्मानाबद्दल आमदार डॉ.तुषार राठोड व त्यांचे कार्यकर्ते, वैद्यकीय संस्थेचे अनेक सदस्य, आयएमएचे सदस्य, सुप्रभात मित्र मंडळाचे सदस्य, जिप्सी मॉर्निंग ग्रुपचे सदस्य, नगर परिषदेचे सदस्य, अनेक पत्रकार, वकील, सेवाभावी कार्यकर्ते, गावातील प्रतिष्ठित व्यक्ती, अनेकांनी प्रत्यक्ष, व्हाट्सअप द्वारा, फोन द्वारा, सोशल मीडिया वरून अभिनंदन करून शुभेच्छा दिल्या. डॉ. दिलीप पुंडे यांचे सर्व स्तरातून अभिनंदन होत आहे.
About the Author
