मुखेड: (दादाराव आगलावे)
कष्ट, जिद्द आणि प्रामाणिक मेहनतीच्या जोरावर यशाचे शिखर गाठणारे युवक म्हणजे मनोहर विठ्ठलराव खुडे होय. हिंगोली जिल्ह्यातील कळमनुरी तालुक्यातील घोळवा या छोट्याशा गावातील शेतकरी कुटुंबात त्यांचा जन्म झाला. आई-वडील शेतकरी असल्यामुळे घरची परिस्थिती अत्यंत साधी होती. मात्र मुलांनी शिक्षण घेऊन मोठे व्हावे यासाठी त्यांच्या आई-वडिलांनी शेतीमध्ये प्रचंड काबाडकष्ट केले. उन्हातान्हात राबून त्यांनी मुलांच्या शिक्षणासाठी कोणतीही कमी पडू दिली नाही.
लहानपणापासूनच मनोहर खुडे यांना गाड्यांविषयी विशेष आकर्षण होते. गाडी चालवणे आणि गाडीच्या इंजिनमधील तांत्रिक बाबी समजून घेणे यामध्ये त्यांना विशेष रस होता. मोठे होऊन उत्कृष्ट मेकॅनिक बनायचे हे स्वप्न त्यांनी बालपणातच मनाशी बाळगले होते. आपल्या आवडीला योग्य दिशा देण्यासाठी त्यांनी वारंगा येथे आयटीआयचे दोन वर्षांचे शिक्षण पूर्ण केले. त्यानंतर २०१४ पासून त्यांनी मोटरसायकल मेकॅनिक म्हणून आपल्या कारकिर्दीची सुरुवात केली. सुरुवातीच्या काळात त्यांनी छत्रपती संभाजीनगर येथील सहारा मोटर्समध्ये दोन वर्षे प्रामाणिकपणे व उत्कृष्ट काम केले. त्यांच्या कामातील बारकावे, ग्राहकांशी असलेले नम्र वर्तन आणि गाड्यांमधील तांत्रिक अडचणी अचूक ओळखण्याच्या कौशल्यामुळे त्यांनी अल्पावधीतच स्वतःची वेगळी ओळख निर्माण केली. दरम्यान त्यांच्या आई-वडिलांनी त्यांचा विवाह सौ. आश्विनी यांच्यासोबत करून दिला. सौ. आश्विनी या मनोहर खुडे यांच्या यशामागील मोठा आधारस्तंभ मानल्या जातात. कुटुंबाची जबाबदारी सांभाळत त्यांनी मनोहर यांना प्रत्येक टप्प्यावर मोलाचे सहकार्य केले. त्यांना श्रेयांश हा चिमुकला मुलगा असून त्याला उच्च शिक्षित करून मोठे व्यक्तिमत्त्व घडवण्याचा त्यांचा मानस आहे.
मुलाच्या शिक्षणासाठी त्यांनी नांदेड येथे वास्तव्यास राहण्याचा निर्णय घेतला आहे. सध्या नांदेड येथील नंदी मोटर्समध्ये ते रॉयल इन्फिल्डचे उत्कृष्ट मेकॅनिक म्हणून कार्यरत आहेत. त्यांच्या कामातील अचूकता, मेहनत आणि ग्राहकांचा विश्वास यामुळे आज ते नांदेड जिल्ह्यात सुपरिचित झाले आहेत. अनेक जण विशेषतः आपल्या गाड्या दुरुस्त करण्यासाठी मनोहर खुडे यांच्याकडेच येतात. रॉयल इन्फिल्डसारख्या दमदार गाड्यांच्या तांत्रिक समस्या सोडवण्यात त्यांना विशेष प्राविण्य मिळाले आहे.
शेतकरी कुटुंबातील एका युवकाने जिद्द, मेहनत आणि कौशल्याच्या जोरावर स्वतःचे वेगळे स्थान निर्माण केले असून मनोहर खुडे यांचा जीवनप्रवास आज अनेक युवकांसाठी प्रेरणादायी ठरत आहे.यश मिळवण्यासाठी मेहनत, प्रामाणिकपणा आणि सातत्य खूप महत्त्वाचे असते. आई-वडिलांनी केलेले कष्ट आणि पत्नीचे मिळालेले सहकार्य यामुळेच मी आज इथपर्यंत पोहोचलो आहे. ग्राहकांचा विश्वास हीच माझी खरी कमाई आहे. पुढील काळात आणखी उत्कृष्ट सेवा देत आपल्या मुलाला उच्च शिक्षित करून समाजात चांगला माणूस घडवण्याचा माझा प्रयत्न राहील. अशी प्रतिक्रिया मनोहर विठ्ठलराव खुडे यांनी प्रस्तुत प्रतिनिधीशी दिली.
About the Author
