कंधार :{ दिगांबर वाघमारे }
कंधार तालुक्यातील जांभूळवाडी येथील श्री शिवाजी हायस्कूल कंधारची विद्यार्थिनी कु. प्रतिक्षा संग्राम मुसळे हिने दहावी बोर्ड परीक्षेत उल्लेखनीय यश संपादन करत कंधार तालुक्यात प्रथम येण्याचा मान मिळविला. तिच्या या यशाबद्दल कंधार येथील सुंदर अक्षर कार्यशाळेत तिचा व तिच्या मातोश्री सौ. लक्ष्मीबाई संग्राम मुसळे यांचा विशेष सत्कार करण्यात आला.
अल्पभूधारक शेतकरी कुटुंबातील प्रतिक्षाचा जन्म १० नोव्हेंबर २०१० रोजी झाला. तिचे वडील संग्राम मुसळे हे कुटुंबाचा उदरनिर्वाह करण्यासाठी चालक म्हणून कार्यरत आहेत. प्रतिकूल परिस्थितीतही जिद्द, मेहनत आणि आत्मविश्वासाच्या बळावर प्रतिक्षाने हे यश संपादन केले.
यंदाच्या कॉपीमुक्त परीक्षेच्या वातावरणात अभ्यास करून “मला माझ्या श्री शिवाजी हायस्कूलचे नाव उज्ज्वल करायचे आहे,” हा निर्धार तिने पूर्ण करून दाखविला. सुंदर अक्षर कार्यशाळेच्या मार्गदर्शनामुळे आत्मविश्वास वाढल्याचे प्रतिक्षाने यावेळी सांगितले.
शैक्षणिक गुणवत्तेबरोबरच प्रतिक्षा नृत्यकला, भाषणकला आणि सृजनशील उपक्रमांमध्येही अग्रेसर आहे. विशेष म्हणजे सातवीत असतानाच तिने स्वतःचे यूट्यूब चॅनल सुरू करून आपली वेगळी ओळख निर्माण केली आहे.कार्यशाळेदरम्यान विद्यार्थ्यांच्या उपस्थितीत डॉ. गजानन आंबेकर व सुंदर अक्षर कार्यशाळेच्या संचालिका सौ. संगीता आंबेकर यांच्या हस्ते प्रतिक्षा व तिच्या मातोश्रींचा सत्कार करण्यात आला. यावेळी उपस्थितांनी तिच्या पुढील शैक्षणिक वाटचालीस शुभेच्छा दिल्या.
About the Author
