मुखेड (प्रतिनिधी):
विमुक्त जाती सेवा समिती, वसंतनगर (कोटग्याळ) ता. मुखेड यांच्या आदेशानुसार ग्रामीण कला, वाणिज्य व विज्ञान महाविद्यालय, वसंतनगर (कोटग्याळ), ता. मुखेड, जि. नांदेड येथे प्रो. डॉ. देविदास केंद्रे यांची दुसऱ्यांदा प्र. प्राचार्यपदी नियुक्ती करण्यात आली आहे. त्यांच्या नियुक्तीमुळे महाविद्यालयाच्या शैक्षणिक, प्रशासकीय व सर्वांगीण विकासाला नवसंजीवनी मिळेल, असा विश्वास शिक्षक, कर्मचारी, विद्यार्थी आणि पालकांनी व्यक्त केला आहे.
प्रो. डॉ. देविदास केंद्रे हे अभ्यासू, शिस्तप्रिय, दूरदृष्टीचे व विद्यार्थीहित जपणारे प्रशासक म्हणून परिचित आहेत. यापूर्वी प्राचार्य म्हणून कार्यरत असताना त्यांनी महाविद्यालयातील शैक्षणिक गुणवत्ता वृद्धिंगत करण्यासाठी अनेक विधायक उपक्रम राबविले. विद्यार्थ्यांमध्ये गुणवत्तापूर्ण शिक्षणाची आवड निर्माण करण्याबरोबरच संशोधनाला प्रोत्साहन, विविध शैक्षणिक व सांस्कृतिक उपक्रमांचे प्रभावी आयोजन, राष्ट्रीय सेवा योजना, क्रीडा, स्पर्धा परीक्षा मार्गदर्शन, वृक्षारोपण, पर्यावरण संवर्धन, करिअर मार्गदर्शन आणि व्यक्तिमत्त्व विकास कार्यक्रम यांसारखे उपक्रम यशस्वीपणे राबविले. त्यांच्या कार्यकाळात महाविद्यालयातील प्रशासकीय कामकाज अधिक पारदर्शक, गतिमान व विद्यार्थी-केंद्रित झाले. शिक्षक व कर्मचाऱ्यांमध्ये समन्वयाचे वातावरण निर्माण करून त्यांनी संस्थेच्या प्रगतीसाठी सातत्याने प्रयत्न केले. त्यांच्या नेतृत्वामुळे महाविद्यालयाची शैक्षणिक प्रतिमा अधिक उंचावली असून विद्यार्थ्यांच्या सर्वांगीण विकासाला चालना मिळाली.
या नियुक्तीबद्दल संस्थेचे सचिव गंगाधरराव गोविंदराव राठोड यांनी प्रो. डॉ. केंद्रे यांचे अभिनंदन करून त्यांच्या अनुभवाचा महाविद्यालयाच्या विकासासाठी निश्चितच लाभ होईल, असा विश्वास व्यक्त केला. तसेच मुखेड-कंधार विधानसभा मतदारसंघाचे लोकप्रिय कार्यसम्राट आमदार डॉ. तुषार राठोड यांनीही त्यांना शुभेच्छा देत महाविद्यालयाने शैक्षणिक क्षेत्रात अधिक प्रगती करावी, अशी अपेक्षा व्यक्त केली.
यावेळी सेवानिवृत्त प्राचार्य प्रो. डॉ. हरिदास राठोड, प्रा. डॉ. रामकृष्ण बदने, प्रा. डॉ. डी. सी. पवार, प्रा. डॉ. उमाकांत पद्मवार, कार्यालयीन अधीक्षक रमेश गोकुळे तसेच महाविद्यालयातील सर्व प्राध्यापक, शिक्षकेतर कर्मचारी आणि विविध क्षेत्रातील मान्यवरांनी प्रो. डॉ. देविदास केंद्रे यांचे अभिनंदन करून त्यांच्या भावी कार्यासाठी शुभेच्छा दिल्या. प्रो. डॉ. देविदास केंद्रे यांच्या पुनर्नियुक्तीमुळे ग्रामीण कला, वाणिज्य व विज्ञान महाविद्यालय, वसंतनगर (कोटग्याळ) येथील शैक्षणिक गुणवत्ता, संशोधन, विद्यार्थी विकास आणि संस्थेची सर्वांगीण प्रगती अधिक वेगाने होईल, असा आशावाद व्यक्त केला जात आहे.
About the Author
