मुखेड: (दादाराव आगलावे)
शिक्षण क्षेत्रात वेगाने होत असलेल्या बदलांच्या पार्श्वभूमीवर विद्यार्थी, शिक्षक, पालक आणि समाज यांच्यासमोरील आव्हानांवर सखोल चर्चा घडवून आणण्याच्या उद्देशाने मानवता विचारमंच आणि माजी नगराध्यक्ष बाबुराव देबडवार यांच्या संयुक्त विद्यमाने ‘आजच्या शिक्षणाची दशा व दिशा’ या समकालीन विषयावर विशेष व्याख्यानाचे आयोजन करण्यात आले आहे. हा कार्यक्रम शुक्रवार, दि. १७ जुलै रोजी सायंकाळी ५ वाजता आर्य वैश्य मंगल कार्यालय, मुखेड येथे संपन्न होणार आहे.
कार्यक्रमाच्या अध्यक्षस्थानी आमदार डॉ. तुषार राठोड हे राहणार असून, शिक्षण क्षेत्रातील अभ्यासू विचारवंत प्रा. डॉ. नागोराव कुंभार व जागतिक कीर्तीचे सर्पदंश चिकित्सक डब्ल्यूएचओ सदस्य मुखेड भूषण डॉ. दिलीप पुंडे हे प्रमुख व्याख्यानातून आजच्या शिक्षण व्यवस्थेची सद्यस्थिती, बदलते शैक्षणिक प्रवाह, राष्ट्रीय शैक्षणिक धोरण, गुणवत्तापूर्ण शिक्षणाची आवश्यकता तसेच विद्यार्थ्यांसमोरील विविध आव्हानांवर सखोल मार्गदर्शन करणार आहेत. कार्यक्रमाला प्रमुख अतिथी म्हणून मनोहर पाटील येवतीकर (निवृत्त उपशिक्षणाधिकारी, जि.प. नांदेड), डॉ. शिवानंद अडकीने (प्राचार्य, महात्मा ज्योतिबा फुले महाविद्यालय), डॉ. श्रीपती पवार (प्राचार्य, शाहीर अण्णाभाऊ साठे महाविद्यालय), डॉ. देवीदास केंद्रे (प्राचार्य, ग्रामीण महाविद्यालय वसंतनगर), गटशिक्षणाधिकारी बी. एम. पाटील, मुखेड तालुका मराठी पत्रकार संघाचे तालुकाध्यक्ष महेताब शेख,
मुखेड पत्रकार संघाचे अध्यक्ष तथा ‘लोकराज्य’चे संपादक ज्ञानेश्वर डोईजड तसेच यांची उपस्थिती लाभणार आहे. आजच्या स्पर्धात्मक युगात शिक्षणाची गुणवत्ता, विद्यार्थ्यांच्या कौशल्यविकासाची गरज, डिजिटल शिक्षणाचे वाढते महत्त्व, पालक व शिक्षकांची भूमिका आणि मूल्याधिष्ठित शिक्षणाची आवश्यकता या विविध अंगांवर या व्याख्यानातून मार्गदर्शन केले जाणार असल्याने हा कार्यक्रम शिक्षण क्षेत्रासाठी विशेष महत्त्वाचा ठरणार आहे.या व्याख्यानाचा लाभ विद्यार्थी, शिक्षक, पालक, शिक्षणप्रेमी नागरिक तसेच सर्व क्षेत्रातील मान्यवरांनी घ्यावा, असे आवाहन माजी नगराध्यक्ष बाबुराव देबडवार तसेच मानवता विचारमंचाचे संस्थापक अध्यक्ष संग्राम स. मस्कले, अध्यक्ष सदाशिव पाटील जाधव, बालाजी लिंगनवाड, विठ्ठलराव इंगळे, प्रा. नयना चवळे, बापूराव कांबळे, किशन पा. उमाटे, विलास चौहान, अशोक पांपटवार, शरद कोडगिरे, गौतम गवळे, आयुष पोलावार आणि अवनीश देबडवार यांनी केले आहे.
About the Author
