सरसकट शेतीचे पंचनामे करण्याचे आ. शिंदे यांचे प्रशासनाला निर्देश
कंधार /प्रतिनिधी
गेली तीन ते चार दिवस विश्रांती घेतलेल्या पावसाने गुरुवारी पहाटे लोहा-कंधार मतदारसंघात जोरदार एन्ट्री करत कापसी, मारतळा, गोळेगाव ,दहीकळंबा, चिखली, हळदा ,लाडका, दिंडा,काटकळंबा,कौठा, राऊतखेडा, धानोरा, चौकीमहाकाय,बारूळ, औराळ व परिसरात झालेल्या अतिमुसळधार पावसाने या भागातील शेतीची पूर्णपणे खरडपट्टी होऊन उभी पिके वाहून गेली, या भागातील शेतीच्या प्रत्यक्ष थेट बांधावर जाऊन काल शुक्रवारी लोहा-कंधार मतदारसंघाचे लोकप्रिय, कर्तव्यदक्ष आमदार श्यामसुंदर शिंदे यांनी पाहणी करून आढावा घेतला व सर्व शेतीचे सरसकट पंचनामे करण्याचे निर्देश यावेळी आमदार शिंदे यांनी प्रशासकीय अधिकाऱ्यांना दिले,
या मुसळधार पावसामुळे अनेक शेतकऱ्यांच्या शेतातील शेती उपयोगी साहित्य पुराच्या पाण्यात वाहून गेले. लाडका व धानोरा येथील पूल पावसाच्या पाण्यामुळे खचून गेला होता,हळदा येथील घरांची पडझड झाली होती या सर्व बाबींचा आढावा यावेळी आमदार शिंदे यांनी घेतला,नुकसानग्रस्त पुलांची दुरुस्ती तात्काळ करण्याचे निर्देशही यावेळी आमदार शिंदे यांनी सार्वजनिक बांधकाम विभागाच्या अधिकाऱ्यांना दिले, मतदारसंघातील शेतकऱ्यांनी खचून न जाता धीर धरावा मी शेतकऱ्यांना आर्थिक मदत मिळवून देण्यासाठी कटीबद्ध असून मी मतदार संघातील शेतकऱ्यांच्या मागे खंबीरपणे उभा असल्याचे यावेळी आमदार श्यामसुंदर शिंदे यांनी शेतकऱ्यांशी बोलताना स्पष्ट केले .
यावेळी तहसीलदार व्यंकटेश मुंडे, सार्वजनिक बांधकाम उपविभागीय अभियंता सुरेश जोशी, तालुका कृषी अधिकारी सदानंद पोटपेलवार,गटविकास अधिकारी मांजरमकर, जलसंधारणचे अधिकारी तेलंग सह सर्व तलाठी, मंडळ अधिकारी, ग्रामसेवक, सरपंच, शेतकरी बांधव कार्यकर्ते उपस्थित होते.
